Oromia>> Dhiiga Gootaa

Apr 13, '07 9:43 AM for everyone

DHIIGA GOOTAA

Dhugaan hawwaalamte hirriba dhorkitee

'' Maaloo naaf birmadhaa '' jettee itti watwaattee

Jireenya mi'ooftuu itti hadheesitee

Sammuu isaanii  keessatti hidda biqilichitee

Bakka  deeman  mara isaan waaliin deemtee

Alkanii fi Guyyaa walii wallaalichistee

'' Gabrummaan Dukkana ''jettee itti hasaastee

'' Yookaan  Bilisoomaa yookaan  du'aa ! '' jettee

Mamii tokko malee garaa kutachiistee

'' Alli koo fi manni koo Qabisoo ! ''

jechisiisitee

Lagatti bobbaaste manaa isaan baastee.

Kufanii  ka'anii  ka'anii kufanii

Itti beela'anii itti dheebotanii

Qabsoo bu'uursanii ka wareegamani

Akka Hoolaa rakoo ka mormaa qalamani

ka karaatti afan ka  awwaalamani

Du'a akkamalee ka Harkaan hudhamani

Ka duuni dhokate ka jiraa dhabamani

Haqa falmatanii  ka nu irraa adda bahani

Ka qananii haa taatu ekeraan isaanii

Goggogee hin banne !  tasa Dhiiginni  isaanii.

Duumes   irra bu'ee hin gaadiddeesine

cululuquu isaa hin gurraacheesine

Bokkaan itti roobee dhiqee hin balleesine

Lolaans fudhatee ittiin hin godaanne

Bubbee inni hamaan tasuma itti hin buune

Ittiin balali'ee fuudhee Biyyaa  hin baane

Cabbiin irra ciisee  awwaalee hin dhokkisne

Xammee xammisiisee badee hin balleesine.

Cophee dhiiginni Gootaa  biqilee idda baasee

Guddatee dagaagee latee baala  baasee

Hidda isaa fageessee damee isaa jabeessee

Qancaree gaamaree Firii isaa ramibaasee

Oromiyaa guutuu firii isaa facaasee

Firii isaa irraa cuunfee Boba'aa irraa baase

Boba'aan  Boba'ee nuuf dukkana ibse

Isa rafaa jiru tutuqee sochoosee

Asi raasee achi raasee irriba irraa kaase

Daa'immanni xixiqqoo sossobee hurursee

Kotikkotee guddise Seenaa  gurra buusee

warri Dhiiga isaanii tasaan  dhangalaase

Akkuma qoosaatti Lubbuu isaanii baase

ka jireenya isaanii lafa irraa balleese

ka jiruun doorsisuuf qalee conqolaase

Yoo itti fakkaates waan qabsoo kolaase

Isaanis ajjeesee waan kaayyoo balleese

Gurra isaa banatee yoo qalbiin caqase

Qabsoo hin ajjeesine daran itti cimse !

Lubbuu yoo balleese   ekeraan lalise

Yoo tokko ajjeese  kuma   bakka busee

Guddina qabsichaa isatti agarsiise

Ammas haa hubatu haa yaadu  fageessee

Qabsoon keenya haqa kanatuu dagaagise

Galiin Bilisummaa  guyyaan gaafa geesse

Galiin Bilisummaa  guyyaan gaafa geesse.


(walaloon kun Aaddee Meetii (meetii66@yahoo.de) irraa nuqaqqabe. Aaddee Meetii, maqaa OromiaTimes n hedduu isin galateeffanna! Itti nuu fufaa!)